អ្វីដែលឪពុកម្តាយត្រូវ​ត្រៀម​ខ្លួនសម្រាប់កូនដំបូង ?

ការធ្វើជាឪពុកម្តាយលើកទីមួយ គឺជាពេលវាដ៏ពិសេស រំភើបមួយនៅក្នុងជីវិត។ ហេតុនេះ អ្នក​ត្រូវ​មាន​ការ​ត្រៀម​ខ្លួន​នូវ​ចំណុចជាច្រើន​ដូចខា​ងក្រោម៖

1. គ្រប់គ្រង​អារម្មណ៍​របស់​ខ្លួន​។ ទប់អាម្មណ៍​ដើម្បីកុំអោយ​ពេល​ខឹងវៃដំបូងរបស់អ្នក នៅពេលដែលក្មេងរពិស ឬមិនស្តាប់បង្គាប់របស់អ្នក។ ពេលខ្លះ ពេលដែលឪពុកនិងម្តាយឈ្លោះគ្នា គាត់ឈានដល់ថ្នាក់យកកូនជាឧបករណ៍បញ្ចេញកំហឹងក៏មានផងដែរ។

2. សួរបទពិសោធន៍ពីការ​ចិញ្ចឹមកូនពីប៉ាម៉ាក់ ឬ​អាន​សៀវភៅ។ អ្នកខ្លះ និយាយថា កូនដំបូង ហាក់ដូចជាការធ្វើពិសោធន៍លើកដំបូងរបស់ឪពុកម្តាយ ពីរបៀបនៃការចិញ្ចឹម។ ភាគច្រើន កូនទី២ ឬទី៣ ច្រើនតែទទួលបានការចិញ្ចឹមយ៉ាងល្អជាងកូនទីមួយ ដោយឪពុកម្តាយមានបទពិសោធន៍ក្នុងការចិញ្ចឹម រួមផ្សំនឹងវ័យរបស់ពួកគាត់បានរីកចម្រើនជាងមុន។

3. ត្រៀមហិរញ្ញវត្ថុ និទីកន្លែង​ស្នាក់នៅអោយបាន​សមរម្យ។ សម្រាប់កូនដំបូង គឺកើតឡើងនៅពេលដែលគ្រួសារថ្មីទើបតែកវែងកឆ្នាំង។ ហេតុនេះ ពេលខ្លះសេដ្ឋកិច្ចគ្រួសារមិនទាន់មានភាពប្រសើរគ្រប់គ្រាន់ក្នុងការផ្តល់លក្ខខណ្ឌចិញ្ចឹមកូនបានត្រឹមត្រូវ រួម​ទាំង​កន្លែង​ស្នាក់នៅមិនទាន់ត្រឹមត្រូវ​សម្រាប់ក្មេងផងដែរ។ កូនដំបូងអាចប្រឈមមុខនូវការលំបាកច្រើននៅពេលដែលខ្លួននៅតូច បើប្រៀបធៀបទៅនឹងកូនទី២ ឬទី៣។ ដោយហេតុផលជីវភាព ពេលខ្លះកូនដំបូងត្រូវឈប់សិក្សាដើម្បីជួយរកស៊ីចិញ្ចឹមគ្រួសារ និងជួយអោយប្អូនៗបានបន្តការសិក្សា។
ដោយហេតុផលខាងលើនេះ បានជាឪពុកម្តាយមួយចំនួនគាត់មានការស្តាយក្រោយ និងគិតថាខ្លួនមានកំហុសចំពោះកូនដំបូង។

ឪពុកម្តាយអាចជ្រើសរើសវិធីសាស្ត្រដូចខាងក្រោម៖
1. ត្រៀមខ្លួនរួចជាស្រេចមុននឹងសម្រេចចិត្តយកកូន។ អ្នកអាចត្រៀមទាំងសេដ្ឋកិច្ច និង ត្រៀមទាំងផ្លូវចិត្ត និងពេលវេលាគ្រប់គ្រាន់សម្រាប់កូនអ្នក។
2. ដោយសារអ្នកគ្មានបទពិសោធន៍ក្នុងការចិញ្ចឹមកូន សូមអ្នកអានសៀវភៅ និង ចូលរួមវគ្គសិក្សាពីរបៀបនៃការចិញ្ចឹមកូន ដើម្បីអោយអ្នកអាចចិញ្ចឹមកូនអ្នកបានយ៉ាងល្អ។ អ្នក​ក៏​អាច​សាកសួរ​ពី​របៀប​នៃ​ការ​ចិញ្ចឹមកូន​ពី​រៀន​ច្បង ឬ​អ្នក​ដែល​ធ្លាប់​ចិញ្ចឹម​កូ​ន​បាន​ល្អ​ពី​មុន​មក។

អត្ថបទដោយ ៖ Admin Rosmeanney